हेल्थ टिभी अनलाइन \काठमाडौं : नेपालमा कोरोना संक्रमणबाट निको हुने दर ९४ दशमलब ५ प्रतिशत रहेको छ ।

स्वास्थ्य तथा जनसंख्या मन्त्रालयका प्रवक्ता डा कृष्ण प्रसाद पौडेलले नेपालमा कोरोना भएर निको हुने दर अहिले ९४ दशमलब ५ प्रतिशत रहेको जनाएका हुन्। उनले पछिल्लो समय कोरोनाबाट निको हुनेको दर बढेको जनाए ।

हाल देशभर पीसीआर विधिबाट गरिएको परीक्षणबाट ६ लाख ५० हजार १६२ र एन्टिजेट विधिबाट गरिएको परीक्षणमा ४० हजार ८१२ जनामा कोरोना पुष्टि भएको छ । यीमध्ये हालसम्म ६ लाख १४ हजार ३२७ जना भने निको भइसकेका छन्। मन्त्रालयका अनुसार हालसम्म कोरोना संक्रमण भएर ९ हजार २९१ जनाको मृत्यु भएको छ । उता अहिलेसम्म ३३ लाख ९१ हजार ३७९ जनाको पीसीआर परीक्षण गरिएको छ ।

यसैगरी २ लाख १७ हजार ४२१ जनाको एन्टिजेन गरिएको छ । नेपालमा कोरोना संक्रमण हुनेमा पुरुष ६० प्रतिशत र महिला ४० प्रतिशत रहेको पाइन्छ । दोस्रो वेभमा कोरोना संक्रमण हुने महिलाको संख्या पहिलो वेभको तुलनामा बढी छ ।