हेल्थ टिभी अनलाइन \काठमाडौं : नेपालमा निषेधाज्ञा खुकुलो हुदै जाँदा पुन कोरोना संक्रमण बढ्न थालेको छ ।

आज मात्रै देशभर ११ हजार ८९८ जनामा परीक्षण गर्दा २९ सय ७९ जनामा कोरोना पुष्टि भएको हो । यो भनेको हिजोअस्तिको भन्दा बढी हो । हिजो मंगलबार १२ हजार ५८५ परीक्षण गर्दा २६ सय ३४ जनामा कोरोना देखिएको थियो । यसैगरी सोमबार ११ हजार ५२७ परीक्षण गरिएकोमा २६ सय २२ जनामा कोरोना पुष्टि भएको थियो ।

कोरोना संक्रमण कम भएको भन्दै सरकारले लकडाउन खुकुलो गर्दै गएको भए पनि संक्रमण दर भने घट्न सकेको छैन । मन्त्रालयका अनुसार आज २८ जना कोरोना संक्रमितको मृत्यु भएको छ । योसहित देशभर कोरोनाबाट मृत्यु हुनेको संख्या ९ हजार २९१ पुगेको छ । उता आज कोरोना संक्रमणमुक्त भएर डिस्चार्ज हुनेको संख्या १३ सय ३३ रहेको छ ।

हाल देशभर २६ हजार ५४४ जना सक्रिय संक्रमित रहेका छन्।