हेल्थ टिभी अनलाइन \काठमाडौं : काठमाडौंको बसुन्धरामा रहेको ईशान बाल तथा महिला अस्पतालमा २ दिने नवजात शिशुको जटिल शल्यक्रिया गरिएको छ । खाने नली राम्ररी विकास नभएर खाएको कुरा पेटसम्म नगई सिधै फोक्सोमा जाने समस्या लिएर आएको २ दिनको बच्चाको सफल शल्यक्रिया गरिएको हो ।

अस्पतालका कार्यकारी निर्देशक तथा वरिष्ठ बाल शल्य चिकित्सक डा आरपी चौधरीको नेतृत्वको टिमले उक्त शल्यक्रिया गरेको हो । नवजात शिशु खाने नली र श्वासनली जोडिएको अवस्थामा अस्पताल आएको र आफूहरुले शल्यक्रिया मार्फत समस्या समाधान गरेको डा चौधरीले बताए । यो अवस्थालाई मेडिकल भाषामा ‘Esophageal atresia’ भनिन्छ । उनले ईशान बाल अस्पतालमा यसअघि पनि यस किसिमको जटिल शल्यक्रिया गरिएको भए पनि २ दिनको बच्चाको र जम्मा २ केजीको तौल भएको बच्चाको शल्यक्रिया भने पहिलो पटक भएको जनाए ।

पोखरा गण्डकी मेडिकल कलेजबाट रिफर भएर आएको उक्त शिशुको खानेनली ब्लक भएका कारण खाएको कुनै पनि खानेकुरा पेटसम्म नपुगी सिधै फोक्सोमा पुग्ने समस्या देखिएको थियो । यस्तो समस्यामा यहाँ सम्मकी शिशुको मुखमा आउने र्याल, थुक पनि पेटतिर नगई फोक्सोतिर जाने गर्छ । जसले गर्दा बच्चालाई निमोनिया हुन्छ र यस्तो अवस्थामा आमाले दुध खुवाउँदा झनै दुध सर्केर श्वासनलीमा गई शिशुको मृत्यु समेत हुनसक्ने डा चौधरी बताउँछन्। यो बर्थ डिफेक्टका बारेमा आमा र चिकित्सक चनाखो नभएमा बच्चाको तक्त्कालै मृत्यु हुनसक्ने डा चौधरीको भनाई छ ।

त्यसो त यस्तो समस्या निकै कम शिशुमा हुने देखिन्छ । १० हजार बच्चामा एक जनामा यस्तो समस्या देखिने डा चौधरी बताउँछन्। डा चौधरीको टिमले उनको माथिल्लो खाने नली र तल्लो खाने नलीलाई शल्यक्रियामार्फत जोडिदिएका हुन्।  शल्यक्रिया सफल भएपछि सोमबार शिशु अस्पतालबाट डिस्चार्ज समेत भइसकेका छन्।