हेल्थ टिभी अनलाइन \काठमाडौं : नेपालमा हालसम्म ५ लाख ९५ हजार ३६४ जनामा कोरोना संक्रमण पुष्टि भएको छ । यीमध्ये ३८ दशमलब ९६ प्रतिशत अर्थात २ लाख ३१ हजार ९२५ जना महिला रहेका छन् भने बाँकी ६१ दशमलब ४ प्रतिशत अर्थात ३ लाख ६३ हजार ४३९ जना पुरुषमा कोरोना पुष्टि भएको छ ।

यसले पनि के देखाउँछ भने कोरोना भाइरसले महिलाको तुलनामा पुरुषलाई बढी असर गरिरहेको छ । कोरोना महामारीबाट बढी प्रभावित हुने अमेरिका,ब्राजिल भारत लगायतका देशमा पनि कोरोना संक्रमण हुने दर पुरुषमा बढी देखिएकोछ । यो दर कोरोनाको पहिलो लहरमा महिलामा अझै कम देखिएको थियो ।

नेपालमा कुल संक्रमितमध्ये ८४ दशमलब ७ प्रतिशत निको भएका छन् भने १ दशमलब ३ प्रतिशत संक्रमितको मृत्यु भएको छ। बाँकी ८२ हजार ७३६ जना सक्रिय संक्रमित आइसोलेसनमा रहेका छन्। यसैगरी सक्रिय संक्रमितमध्ये १३२१ जना आइसीयूमा र ३७२ जना भेन्टिलेटरमा उपचाररत रहेका छन्।

अहिलेसम्म नेपालमा कोरोना संक्रमणबाट ८ हजार ९८ जनाको मृत्यु भइसकेको छ।