हेल्थ टिभी अनलाइन \काठमाडौं :  नेपालमा कोरोना भाइरसको नयाँ भेरियन्ट भेटिएको भन्ने विषयमा स्वास्थ्य तथा जनसंख्या मन्त्रालयले कुनै सत्यता नभएको र आफूहरुलाई यसवारेमा कसरी समाचार आयो भन्ने विषयमा कुनै जानकारी नभएको जनाएको छ ।

मन्त्रालयका प्रवक्ता डा कृष्णप्रसाद पौडेलले अहिले नेपालमा तीनवटा भेरियन्ट मात्र रहेको र छुट्टै भाइरस नभेटिएको जनाएका हुन्। उनले हाल नेपालमा अल्फा, डेल्टा र  कप्पा नाम गरेका भाइरस पुष्टि भएको र अहिले डेल्टा भाइरस बढी सक्रिय रहेको समेत जनाए । उनले बेलायती सञ्चारमाध्यमले भने बमोजिम नेपालमा अहिलेसम्म छुट्टै ‘ नेपाल भेरियन्ट’ फेला नपरेको जनाए ।

बेलायतको डेली मेल लगायतका केही सञ्चार माध्यमहरुले नेपाल भेरियन्टको कोरोना देखिएको र यो बढी संक्रामक भएको भन्दै समाचार लेखेका छन्।

यस विषयमा नेपालस्थित विश्व स्वास्थ्य संगठनले पनि ट्विट गर्दै नेपाल भेरियन्ट भन्ने कोरोनाको कुनै नयाँ भाइरस फेला नपरेको स्पष्ट पारेको छ ।