हेल्थ टिभी अनलाइन \काठमाडौं : प्रेस काउन्सिल नेपालले कोभिड १९ संक्रमणबाट अति प्रभावित ९ जना पत्रकार र उनीहरुका परिवारलाई आर्थिक सहयोग उपलब्ध गराएको छ ।

प्रेस काउन्सिलले कोरोना संक्रमण भई अति सिकिस्त भएपछि भेन्टिलेटर र आइसीयुमा उपचाररत ६ जना पत्रकार र संक्रमणबाट ज्यान गुमाएका ३ जना पत्रकारका परिवारलाई सहयोग उपलब्ध गराएको हो । काउन्सिलले हाललाई जनही रु २५ हजारका दरले सहयोग उपलब्ध गराएको हो ।

भेन्टिलेटरमा उपचाररत धादिङका पत्रकार सुमन अधिकारी, दोलखाका रविन्द्र गौतम जसको जेठ १६ गते निधन भइसकेको छ र रोल्पाका मौसम रोका मगरलाई सहयोग गरिएको हो । यसैगरी आइसीयुमा उपचाररत मुस्ताङका पत्रकार चन्द्रेश्वर बस्ताकोटी, भोजपुरका सन्देश राई र काठमाडौंका हस्त गुरुङलाई सहयोग प्रदान गरिएको काउन्सिलले जनाएको छ । उता मृतक पत्रकार मुगुका सुमन मल्ल, पाँचथरका एकराज भण्डारी र कास्कीका गणेश पौडेलका परिवारलाई पनि सहयोग उपलब्ध गराइएको छ ।

काउन्सिलले यसअघि पनि कोभिड १९ को असरबाट प्रभावित ४५ जना पत्रकारलाई लेखनवृद्धि एवं इन्टरनेट सुविधाबापत सहयोग प्रदान गरेको थियो ।