हेल्थ टिभी अनलाइन : भारतमा कोरोना संक्रमण्बाट मृत्यु हुनेको संख्या ३ लाख नाघेको छ । भारतीय स्वास्थ्य मन्त्रालयका अनुसार त्यहाँ आइतबारसम्म ३ लाख ३ हजार ७५१ जनाले कोरोना संक्रमणबाट ज्यान गुमाएका छन्। विश्वको तथ्यांक हेर्दा अहिलेसम्म सबैभन्दा बढी कोरोना संक्रमणबाट अमेरिकामा मृत्यु भएको छ । अमेरिकामा मात्रै हालसम्म ६ लाख ४ हजार ८७ जनाको मृत्यु भएको छ ।

यसैगरी कोरोनाबाट धेरै संक्रमितको मृत्यु हुने देशमा दोस्रो नमबरमा ब्राजिल परेको छ । ब्राजिलमा ४ लाख ४९ हजार १८५ जनाको मृत्यु भएको छ । यसैगरी बढी मृत्यु हुने तेस्रो देश भारत बनेको छ । भारतमा अहिलेसम्म ३ लाख ३ हजार ७५१ जनाको मृत्यु भएको छ भने २ करोड ६७ लाख बढीमा कोरोना संक्रमण पुष्टि भइसकेको छ ।

भारतमा कोरोना संक्रमणबाट मृत्यु हुने दर १ दशमलब १३ प्रतिशत रहेको छ । यसैगरी कोरोनाबाट निको हुने दर ८८ प्रतिशत रहेको बताइएको छ । हाल भारतमा सक्रिय कोरोना संक्रमितको संख्या २७ लाख २० हजार भन्दा बढी रहेका छन्।