हेल्थ टिभी अनलाइन : भारतमा पछिल्लो समय बालबालिकामा कोरोना संक्रमण तीब्र रुपमा बढ्दै गएको छ । कोरोनाको तेस्रो लहरमा बालबालिका कोरोनाको चपेटामा आउने बताए पनि अहिले नै धमाधम बालबालिका संक्रमणमा पर्न थालेको भारतीय स्वास्थ्य मन्त्रालयले जनाएको छ ।

भारतको कर्नाटकमा मात्रै पछिल्लो १५ दिनमा १९ हजार भन्दा बढी बालबालिकामा कोरोना संक्रमण पुष्टि भएको बताइएको छ । महाराष्ट्रपछि बढी कोरोना संक्रमित भएको कर्नाटकमा पछिल्लो समय बालबालिकामा संक्रमण देखिने क्रम तीब्र रुपमा बढेको भन्दै विशेष सावधानी अपनाउन त्यहाँको सरकारले आग्रह गरेको छ विज्ञहरुले तेस्रो लहरमा कोरोनाको सबैभन्दा बढी चपेटामा बालबालिका पर्ने बताए पनि कोरोनाको दोस्रो लहरमै बालबालिका प्रभािवत मात्रै हैन् मृत्यु समेत हुन थालेपछि त्यहाँ विशेष अलर्ट जारी गरिएको छ ।

कोरोना संक्रमण देखिएका बालबालिकामा कोरोनाका सामान्य लक्षणभन्दा फरक पेट दुख्ने, झाडापखाला लाग्ने, छाला चिलाउने जस्ता लक्षण देखिएको त्यहाँका चिकित्सकहरुले बताएका छन्। बच्चामा कुनै पनि लक्षण देखिने बित्तिकै स्वास्थ्यकर्मीको सल्लाह र परामर्श लिन सबै अभिभावकलाई आग्रह गरिएको छ । नेपालमा पनि बालबालिकामा कोरोना संक्रमण देखिने क्रम पहिलो लहरभन्दा बढी रहेको छ ।