हेल्थ टिभी अनलाइन \काठमाडौं : काठमाडौंको मिनभवनस्थित सिभिल अस्पताल १५० बेडको कोभिड अस्पताल भएको छ ।

शुक्रबार बाग्मती प्रदेशको सामाजिक विकास मन्त्रालय र अस्पतालबीच भएको सम्झौता अनुसार अस्पतालमा कोभिडका बिरामीहरुलाई उपचार गराउनको लागि दुई करोड २४ लाख ५० हजार रुपैयाँ अनुदान सहयोग गर्ने भएसँगै सो अस्पतालमा १५० बेडको कोभिड अस्पताल बनाउने काम अघि बढेको हो ।

सम्झौता अनुसार १५० बेडको अस्पताल सञ्चालनको लागि आवश्यक पर्ने आर्थिक, भौतिक औषधि, उपकरण, भवन, जनशक्ति लगायतको व्यवस्था अस्पतालले नै गर्नुपर्नेछ । साथै अस्पतालले नियमित तोकिएको ढाँचामा बिरामीको दैनिक अवस्थालाई विश्लेषण गरेर स्वास्थ्य कार्यालय काठमाडौंलाई प्रतिवेदन पेस गर्नुपर्ने सम्झौतामा उल्लेख छ ।

सम्झौतामा मन्त्रालयको तर्फबाट वरिष्ठ स्वास्थ्य प्रशासक डा अर्जुनप्रसाद सापकोटा र अस्पतालको तर्फबाट कार्यकारी निर्देशक डा विधाननिधि पौडेलले हस्ताक्षर गरेका छन् ।