हेल्थ टिभी अनलाइन \काठमाडौं : देशभर रहेका ९३ हजार १४१ सक्रिय संक्रमितमध्ये १२ सय ५ जना सिकिस्त कोराना संक्रमितको आइसीयूमा र भेन्टिलेटरमा उपचार भइरहेको छ । स्वास्थ्य तथा जनसंख्या मन्त्रालयका अनुसार सोमबारसम्म देशभर ९१० जना सिकिस्त कोरोना संक्रमित आइसीयूमा र २९५ जनाको भेन्टिलेटरमा राखेर उपचार भइरहेको छ ।

पछिल्लो समय पुष्टि भएका अधिकांश संक्रमितमा कडा लक्षण देखिएका छन्। जसका कारण अस्पतालको उपचार सेवा चाहिने संक्रमितको संख्या बढ्दै गएको हो । उता कुल ४ लाख ३ हजार ७९४ जना संक्रमितमध्ये ३ लाख ६ हजार ७९४ जना निको भएका छन्। अहिले आइसोलेसनमा ९३ हजार १४१ जना सक्रिय संक्रमित रहेको मन्त्रालयले जनाएको छ । तीमध्ये ८६ हजार ४२६ जना होम आइसोलेसनमा रहेका छन् भने ६ हजार ७१५ जना संस्थागत आइसोलेसनमा रहेका छन्।

नेपालमा अहिलेसम्म कोरोना संक्रमण भएर ३ हजार ८५९ जनाको मृत्यु भइसकेको छ । पछिल्लो समय अस्पतालमा संक्रमितको चाप अत्यधिक बढेपछि कयौं संक्रमितले बेड नपाएरै ज्यान गुमाउन बाध्य भइरहेका छन्।