हेल्थ टिभी अनलाइन \काठमाडौं : नेपालमा शनिबार ५ हजार ७६३ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा देशभर ५ हजार ७६३ जना संक्रमित थपिएका हुन्।

यसैगरी गत २४ घण्टामा १९ जनाको कोरोना संक्रमणबाट ज्यान गएको छ । योसँगै देशमा कुल कोरोना संक्रमितको संख्या ३ लाख २८ हजार ८९३ पुगेको छ । यीमध्ये हालसम्म २ लाख ८२ हजार ३८२ जना भने संक्रमणमुक्त भइसकेका छन्। उता हालसम्म कोरोना संक्रमण भएर मृत्यु हुनेको संख्या ३ हजार २९८ पुगेको मन्त्रालयले जनाएको छ ।

नेपालमा कोरोना संक्रमणबाट निको हुने दर घटेर ८५ दशमलब ९ प्रतिशत भएको छ । आज देशभर १२ सय ८७ जना संक्रमित कोरोनालाई जितेर डिस्चार्ज भएका छन्। गत २४ घण्टामा १४ हजार ४०३ पीसीआर विधिबाट र ५६६ जनाको एन्टिजेन विधिबाट परीक्षण गरिएको थियो । पीसीआर गरेकामध्ये ५ हजार ७०६ जनामा कोरोना पोजेटिभ देखिएको हो भने एन्टिजेनमा ५७ जनाको रिपोर्ट पोजेटिभ आएको हो ।

हाल देशभर सक्रिय कोरोना संक्रमितको संख्या ४३ हजार २१३ पुगेको छ । जो होम तथा संस्थागत आइसोलेसनमा रहेका छन्।