हेल्थ टिभी अनलाइन \काठमाडौं : नेपालमा आइतबारसम्म सक्रिय कोरोना संक्रमितको संख्या १९ हजारभन्दा बढी पुगेको छ ।

स्वास्थ्य तथा जनसंख्या मन्त्रालयका अनुसार आज ३ हजार १२२ जना कोरोना संक्रमित थपिएसँगै देशभर आइसोलेसनमा रहने सक्रिय संक्रमितको संख्या १९ हजार ३८२ पुगेको हाे ।

नेपालमा दुई सातायता कोरोना संक्रमितको संख्या ह्वात्तै बढेको हो । भारतमा कोरोनाको दोस्रो लहर शुरु भएदेखि नै नेपालमा पनि संक्रमित बढ्न थालेको पाइन्छ । हालसम्म नेपालमा कुल कोरोना संक्रमितको संख्या ३ लाख ११९ पुगेको मन्त्रालयले जनाएको छ । यीमध्ये ९२ दशमलब ५ प्रतिशत संक्रमित निको भएका छन्। उता आजसम्म कोरोना संक्रमण भएर ज्यान गुमाउनेको संख्या ३ हजार १६४ पुगेको छ ।

कोरोनाको दोस्रो लहरमा संक्रमणदर र मृत्युदर दुबै अत्यन्त बढी पाइएको छ। जसका कारण अस्पताल भर्ना हुने र आइसीयू नै चाहिने संक्रमितको संख्या बढी रहेको मन्त्रालयले जनाएको छ । दिनहुँ सिकिस्त संक्रमित बढेपछि बिरामीले अस्पतालमा बेड पाउनै छोडेका छन्।