भारतबाट आएका ५२ जनामा देखियो कोरोना संक्रमण
हेल्थ टिभी अनलाइन\ काठमाडौं : पछिल्लो २४ घण्टामा भारतबाट आएकाहरुमध्ये एन्टिजेन परीक्षण गर्दा ५२ जनामा कोरोना पोजेटिभ देखिएको छ ।
सरकारले भारतमा कोरोना संक्रमणको दोस्रो लहर तीब्र रुपमा बढ्न थालेपछि नेपाल भित्रिने सीमा नाकामा हेल्थ डेस्क राखेर परीक्षण गर्ने काम शुरु गरेको छ । त्यही क्रममा गत २४ घण्टामा विभिन्न नाकामा गरी ६०२ जनाको एन्टिजेन परीक्षण गर्दा ५२ जनाको पोजेटिभ रिपोर्ट आएको स्वास्थ्य तथा जनसंख्या मन्त्रालयले जनाएको छ ।
मन्त्रालयका अनुसार गड्डाचौकी नाकामा २१८ जनामा परीक्षण गर्दा १० जनामा कोरोना पोजेटिभ देखिएको हो । यसैगरी जमुनाहा नाका बाँकेको हेल्थ डेस्कमा १० जनाको एन्टिजेन परीक्षण गरेकोमा १ जनामा कोरोना पोजेटिभ देखिएको छ भने त्रिनगर नाकाको हेल्थ डेस्कमा ३७२ जनाको परीक्षण गर्दा ४१ जनामा कोरोना संक्रमण पुष्टि भएको छ ।
सरकारले भारतमा कोरोना संक्रमण बढ्दा खुला सीमानाका कारण नेपालमा पनि जोखिम हुने भन्दै चैत ६ गतेदेखि नाकाहरुमा नेपाल भित्रिनेको एन्टिजेन परीक्षण गर्न शुरु गरेको हो । त्यस यता नेपाल प्रवेश गर्ने ७ हजार ५६६ जनाको एन्टिजेन परीक्षण गरिएकोमा हालसम्म ३२४ जनामा कोरोना पोजेटिभ देखिएको मन्त्रालयले जनाएको छ ।
भारतमा कोरोनाका कारण काम पाउन मुश्किल हुने र विद्यालय -कलेज पनि बन्द भएकाले धेरै नेपालीहरु घर फर्किने क्रम बढेको छ । यसरी फर्किनेमा सुदूरपश्चिम प्रदेशका धेरै छन्।
मुटुरोगबाट बच्न विचार व्यवस्थापन
क्षयरोग अन्त्य गर्ने विषयमा छलफल गर्न ३० देशका विज्ञहरु गोवामा भेला
लुम्बिनी प्रदेशको स्वास्थ्य सचिवमा डा वासुदेव उपाध्याय नियुक्त
स्वास्थ्य तथा जनसंख्या मन्त्रीमा प्रदीप यादव नियुक्त
स्वास्थ्यमन्त्री उपेन्द्र यादवले दिए राजीनामा