हेल्थ टिभी अनलाइन : भारतमा कोरोना संक्रमण तीब्र रुपमा बढ्दै गएपछि सरकारले १२ राज्यमा कतै लकडाउन त कतै नाइट कर्फ्यूु लगाएको छ ।

यही क्रममा धेरै संक्रमण देखिएका महाराष्ट्र, मध्यप्रदेश, राजस्थान, पंजाब र दिल्लीमा नाइट कर्फ्यू लगाइएको छ । उता गुजरात, उत्तर प्रदेश, छत्तीसगढ, झारखण्ड, ओडिसा लगयातका राज्यमा आशिंक तथा सम्पूर्ण लकडाउन गरिएको छ । उत्तर प्रदेशका कयौं शहरहरुमा अप्रिल ८ देखि नाइट कर्फ्यू लगाइएको छ ।

कोरोनाको दोस्रो लहरले यतिबेला भारतमा महासंकट आइपरेको छ । अस्पतालहरुमा बेडको अभाव हुन थालेको भन्दै सरकारले ५० प्रतिशत बेड अनिवार्य रुपमा कोरोना संक्रमितको लागि छुट्याउन सबै अस्पताललाई निर्देशन दिएको छ ।

भारतमा एकातिर कोरोना विरुद्धको खोप अभियान चलिरहेको छ भने अर्कोतिर कोरोना संक्रमण तीब्र रुपमा फैलिरहेको छ । गत २४ घण्टामा मात्र त्यहाँ १ लाख ३१ हजार बढी नयाँ संक्रमति थपिएको भारतीय स्वास्थ्य मन्त्रालयले सूचना जारी गर्दै जनाएको छ ।

यसैगरी गत २४ घण्टामा ८ सय बढीले कोरोना संक्रमणबाट ज्यान गुमाएका छन्।