हेल्थ टिभी अनलाइन \काठमाडौं :  नेपालमा हालसम्म २३ लाख २ हजारभन्दा बढीले कोरोनाको आशंकामा पीसीआर परीक्षण गराएका छन्।

स्वास्थ्य तथा जनसंख्या मन्त्रालयका अनुसार बिहिबारसम्म देशभरका ८४ वटा ल्याबबाट कोरोनाको आशंकामा पीसीआर परीक्षण गराउनेको संख्या २३ लाख २ हजार १७३ पुगेको छ । परीक्षण गराएकामध्ये २ लाख ७९ हजार १ सय जनामा कोरोना संक्रमण पुष्टि भएको छ ।

नेपालमा शुरुमा टेकुस्थित राष्ट्रिय जनस्वास्थ्य प्रयोगशालाबाट पीसीआर परीक्षण गर्न शुरु गरिएको थियो । पछि यसलाई विस्तार गर्दै हाल देशभर नीजी र सरकारी गरी ८४ वटा ल्याबबाट कोरोनाको पीसीआर विधिबाट परीक्षण हुँदै आएको छ । ती मध्ये ४८ वटा सरकारी ल्याब रहेका छन् भने ३६ वटा नीजि रहेका छन्। मन्त्रालयका अनुसार हालसम्म सरकारी ल्याबबाट १४ लाख ८५ हजार २१४ जनाको पीसीरआ परीक्षण गरिसकिएको छ ।

उता नीजि ल्याबहरुले ८ लाख १६ हजार ९५९ जनाको पीसीआर परीक्षण गरेका छन्। अहिलेसम्म नेपालमा कोरोना संक्रमण पुष्टि भएकामध्ये ३ हजार ३८ जनाको मृत्यु भएको छ । संक्रमण भएर निको हुने दर ९८ प्रतिशत रहेको मन्त्रालयले जनाएको छ ।

हाल देशभर २४ सय ५४ जना सक्रिय संक्रमित आइसोलेसनमा रहेका छन्।