हेल्थ टिभी अनलाइन \काठमाडौं :  सरकारले चीनबाट अनुदानमा प्राप्त कोरोना विरुद्धको खोप यही चैत २५ गतेदेखि लगाउने तयारी गरेको छ ।

स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले चैत २५ गतेदेखि खोप दिने तयारी भएको बताए। उनले भने, ‘अहिलेलाई काठमाडौं उपत्यकाबाट २५ गतेदेखि खोप दिने तयारी भएको छ । त्यसका लागि अस्पतालहरु छिट्टै तोकिने छ ।’

डा गौतमले यो चाइनिज खोप पढाइ, रोजगार, व्यापार तथा अन्य कामको शिलशिलामा चीन जाने आउने गरिरहन पर्ने समूहलाई प्राथमिकतामा राखेर दिन लागिएको बताएका छन्। उनले चीनमा धेरै काम परिरहने समूह र यसअघि आकिस्मक सेवा अन्तर्गतको सेवामा काम गर्ने कर्मचारी जो खोप लगाउन छुटेका थिए उनीहरुलाई लगाइने बताए ।  बाँकी रहेमा भने अन्य ४० देखि ५९ वर्षसम्मका समूहलाई खोप दिइनेछ ।

चीन सरकारले नेपाललाई  गत साता सहयोग स्वरुप वेइजिङ इन्स्टिच्युट अफ बायोलोजिकल प्रडक्ट कम्पनी लिमिटेडले उत्पादन गरेको सार्स कोभ – २ भ्याक्सिन (भेरोसेल) खोप हस्तान्तरण गरेकाे थियो । उक्त खोप नै अहिले दिन लागिएको हो ।