हेल्थ टिभी अनलाइन \काठमाडौं : नेपालमा सक्रिय संक्रमितको संख्या फेरी एकपटक बढेको छ । पछिल्लो २४ घण्टामा १५२ जना कोरोना संक्रमित थपिएसँगै सक्रिय संक्रमितको संख्या १५ सय ७९ पुगेको हो ।

स्वास्थ्य तथा जनसंख्या मन्त्रालयका अनुसार गत २४ घण्टामा ४ हजार २१३ जनाको पीसीआर परीक्षण गर्दा १५२ जनामा कोरोना संक्रमण पुष्टि भएको हो । केही समय अघि देशमा सक्रिय संक्रमितको संख्या ओरालो लागेर ६ सय भन्दा कम भएको भए पनि केही दिनदेखि संक्रमित थपिने क्रम बढेसँगै सक्रिय संक्रमितको संख्या धेरै भएको हो । उता शुन्यमा झरेको मृत्युदर पनि बढ्न थालेको छ ।

भारतमा दोस्रो लहरको कोरोना तीब्र रुपमा फैलिएसँगै नेपालमा पनि संक्रमितको संख्या बढेको मन्त्रालयका प्रवक्ता डा जागेशवर गौतम बताउँछन्। भारतबाट आएका व्यक्तिहरुमा धमाधम कोरोना पुष्टि हुन थालेको छ ।

यसैगरी आज एक जना कोरोना संक्रमितको मृत्यु समेत भएको छ । योसँगै देशभर कुल कोरोना संक्रमितको संख्या २ लाख ७७ हजार ४६१ पुगेको छ भने कोरोनाबाट मृत्यु हुनेको संख्या ३ हजार ३१ पुगेको छ । उता अहिले पनि कोरोनाको आशंकामा ६३ जना देशका विभिन्न स्थानमा बनाइएका क्वारेन्टाइनमा रहेका छन्। मन्त्रालयका अनुसार कुल कोरोना संक्रमितमध्ये ९८ दशमलब ३ प्रतिशत संक्रमित भने निको भइसकेका छन्।