हेल्थ टिभी अनलाइन \काठमाडौं : केही दिन यतादेखि मौसममा परिवर्तन आई वायु प्रदूषण बढेपछि सरकारले भोलिदेखि ४ दिन देशभरका सबै शिक्षण संस्था बन्द गर्ने निर्णय गरेको छ ।

शिक्षा, विज्ञान तथा प्रविधि मन्त्रालयले वायू प्रदूषणका कारण बालबालिकाको स्वास्थ्यमा गम्भीर असर पर्नसक्ने भन्दै ४ दिन (मंगलबारदेखि शुक्रबारसम्म) का लागि शिक्षण संस्था बन्द गर्ने निर्णय गरेको जनाएको छ । गत शुक्रबारदेखि काठमाडौं उपत्यकालगायतका केही स्थानहरुमा अत्यधिक वायु प्रदूषण बढेको छ । जुन घट्नुको सट्टा झनझन बढ्दै गइरहेको छ ।

यसअघि नै स्वास्थ्य तथा जनसंख्या मन्त्रालयले पनि वायु प्रदूषणका कारण स्वास्थ्यमा असर पर्ने भन्दै अत्यावश्यक नपरेसम्म घरबाहिर ननिस्कन आग्रह गर्दै विज्ञप्ति जारी गरेको थियो । यसैगरी धुलो धुवाँ निकाल्ने कल कारखाना, व्यापार व्यवसाय पनि केही दिनका लागि बन्द गर्न स्वास्थ्य मन्त्रालयले सबैसँग आग्रह गरेको थियो ।

तर पूर्व निर्धारित कार्यतालिका अनुसार परीक्षा सञ्चालन गरिरहेका विश्वविद्यालय तथा उच्च शिक्षा प्रदायक शिक्षण संस्थाहरुले भने स्वास्थ्य सजगता अपनाउँदै परीक्षा सञ्चालन गर्न सक्नेछन्।