हेल्थ टिभी अनलाइन \बाँके : भारतमा कोरोना संक्रमण फेरी बढेपछि बाँकेको जमुनाहा नाका हुँदै नेपाल भित्रिने सबैलाई अनिवार्य १० दिन होम क्वारेन्टाइनमा बस्न आग्रह गरिएको छ ।

जिल्ला कोभिड १९ संकट व्यवस्थापन केन्द्रको बुधबार बसेको बैठकले भारतबाट आउने सबैले अनिवार्य जनस्वास्थ्यका मापदण्ड पालना गर्दै होम क्वारेन्टाइनमा बस्नुपर्ने निर्णय गरेको हो । यसैगरी आज बसेको बैठकले नेपालमा पनि कोरोना संक्रमण बढ्न सक्ने भन्दै यस अघि बनाइएका सबै स्थानका क्वारेन्टाइन एवं आइसोलेसन कक्षलाई तयारी अवस्थामा राख्न समेत निर्देशन दिएको छ ।

नाकामा सबैको एन्टिजेन परीक्षण गरिने र त्यहाँ शंका लागेमा क्वारेन्टाइनमा पठाउने निर्णय भएको बाँकेका प्रमुख जिल्ला अधिकारी राम बहादुर कुरुम्वाङले बताए । उनले बाँके भारतसँग सीमा जोडिएको जिल्ला भएका कारणले पनि बढी जोखिम रहेकाले आवश्यक तयारी गरिरहेको जनाए । उनले उच्च सतर्कता अपनाउँदै सीमामा कडाई गरिरहेको समेत जिकीर गरे ।

अत्यावश्यक काम बाहेक सीमावर्ती क्षेत्रमा अबदेखि आवतजावत गर्न समेत रोक लगाइएको छ । यसैगरी यसअघि खुलेका विद्यालय, कलेज तथा सार्वजनिक कार्यालयमा मास्कको अनिवर्या प्रयोग, सामाजिक दूरी कायम गर्न र सेनिटाइजरको प्रयोग गर्न गराउन आग्रह गरिएको छ ।

भारतमा कोरोनाको दोस्रो कहर देखिन थालेपछि नेपालमा पनि त्यसको असर पर्ने भन्दै उच्च सतर्कता अपनाउन विज्ञहरुले सुझाव दिंदै आइरहेका छन्।