हेल्थ टिभी अनलाइन : भारतमा पुन: एकपटक कोरोना कहर फैलिएको छ । लगातार ५ दिनदेखि त्यहाँ ४० हजार भन्दा बढी नयाँ संक्रमित फेला परेका छन्। पछिल्लो २४ घण्टामा ४७ हजार २६२ जनामा कोरोना पुष्टि भएको छ भने २७५ जना संक्रमितको मृत्यु भएको जनाइएको छ ।

भारतको मुम्बई, दिल्ली, पंजाब, गुजरात लगायतका शहरहरुमा धमाधम संक्रमित बढिरहेका छन्। जसका कारण सरकारले रंगहरुको पर्व होलीमा भिडभाड नगर्न र घरमै बसेर पर्व मनाउन आग्रह गरेको छ । सरकारले सूचना जारी गर्दै सार्वजनिक स्थलमा होलीको कार्यक्रम आयोजना गर्न नपाउने जनाएको हो ।

संक्रमित बढ्न थालेपछि त्यहाँ सरकारले कहीं लकडाउन त कर्ही निशेधाज्ञा जारी गर्दै यसलाई नियन्त्रण गर्ने प्रयास गरिरहेको छ । भारतमा हालसम्म १ करोड १७ लाख ३४ हजार ५८ जनामा कोरोना संक्रमण पुष्टि भइसकेको छ भने १ लाख ६० हजार ४७७ जना संक्रमितको मृत्यु भइसकेको छ ।

भारतमा कोरोना संक्रमण फैलिरहँदा त्यसको जोखिम खुला बोर्डरका कारण नेपालमा पनि देखिने गर्छ । विज्ञहरुले नेपालमा पनि संक्रमण फैलिन सक्ने भन्दै सिमा नाकाहरुमा कडाई गर्नुपर्नेमा जोड दिएका छन्।