हेल्थ टिभी अनलाइन\ काठमाडौं : काठमाडौंको कालिमाटीस्थित स्पार्क हेल्थ होम अस्पतालले २९ औं वार्षिकोत्सव मनाएको छ । मंगलबार अस्पतालले एक कार्यक्रम गरी वार्षिकोत्सव मनाएको हो ।

कार्यक्रममा अस्पतालका प्रबन्ध निर्देशक हरिशरण रिजालले अस्पातलले कोरोना महामारीमा सबै डराएर घर बसेकाे बेलामा पनि सेवा बन्द  नगरी सेवा लिन आएका बिरामीलाई सेवा दिन सकेको बताए ।

यसैगरी अस्पतालका मेडिकल डाइरेक्टर डा सुनिल पौडेलले पछिल्लो समय प्राकृतिक चिकित्साको महत्व अझै बढेको भन्दै सेवा लिन आउनेको पनि संख्यामा उल्लेख्य वृद्धि भएको जनाए । उनले मानिसहरुको जीवनशैली र खानपानमा आएको परिवर्तनका कारण दीर्घ रोग बढेको र यसले निम्त्याउने जटिलतालाई प्राकृतिक चिकित्सा तथा फिजियोथेरापी महत्वपूर्ण हुने समेत जिकीर गरे । उनले कतिपय बिरामीहरु एलोपेथिक चिकित्सकले निको हुँदैन भनेर पठाएकोमा आफुहरुले प्राकतिक चिकित्सा , फिजियोथेरपी, योग लगायतको पद्धतीबाट निको बनाएको जिकीर गरे ।

कार्यक्रममा अस्पतालका निर्देशक रुपेश अधिकारीले स्पार्क अस्पताललाई यहाँ सम्म ल्याउन र यसको शाखा र सेवा विस्तार गर्न बिरामीको विश्वास र कर्मचारीको मिहिनेत परेको बताएका थिए । उनले  प्राकृतिक चिकित्साको बारेमा जनमानसमा सही सूचना पुराएर जनचेतना फैलाउन  सञ्चारकर्मीहरुको पनि ठूलो योगदान रहेको जिकीर गरे ।

वार्षिकोत्सवको अवसर पारेर अस्पातलले स्वास्थ्य पत्रकार मञ्च नेपालको नयाँ निर्वाचित कार्यसमितीलाई बधाई तथा शुभकामना दिंदै सम्मान गरेको थियो । यसैगरी हरेक वर्ष प्रदान गर्दै आएको ‘इम्प्लोइ अफ द इअर’ को अवार्ड अस्पतालकी रिसेप्सनिस्ट झुमा बलामीलाई प्रदान गरिएको थियो । अस्पतालले ११ हजार राशीको उक्त पुरस्कार हरेक वर्ष एक जना उत्कृष्ट कर्मचारीलाई दिंदै आएको छ ।

स्पार्क अस्पताल प्राकृतिक चिकित्सा तथा फिजियोथेरपी क्षेत्रको अग्रणी अस्पतालका रुपमा परिचित छ ।