हेल्थ टिभी अनलाइन \काठमाडौं : सरकारले नेपालमा चिनियाँ कम्पनी ‘बेइजिङ इन्स्टिच्युट अफ बायोलोजिकल प्रडक्ट कम्पनी लिमिटेड’ ले उत्पादन गरेको कोरोना विरुद्धको ‘सार्स कोभ २ भ्याक्सिन (भेरो सेल)  इनएक्टीभेटेड’ लाई आकस्मिक प्रयोगका लागि अनुमति दिएको छ ।

बुधबार औषधि व्यवस्था विभागले आकस्मिक प्रयोगका लागि सो खोपलाई नेपालमा अनुमति दिएको हो । यो अनुमति पाएसँगै नेपालमा अब यो खोप पनि भित्रिने सम्भावना बढेको छ । त्यसो त यसअघि नै चीन सरकारले नेपाललाई ५ लाख डोज कोरोना विरुद्धको खोप दिने प्रतिवद्धता गरिसकेको छ । तर खोपले नेपालमा प्रयोगको अनुमति नपाएकाले सो खोप आउन सकेको थिएन। योसँगै नेपालमा दुईवटा कोरोना विरुद्धका खोपले आकस्मिक प्रयोगका लागि अनुमति पाएका छन्।

नेपालमा यसअघि अक्सफोर्ड एस्ट्राजेनले विकास गरेको र भारतको सिरम इन्स्टिच्युटले उत्पादन गरेको ‘कोभिसिल्ड’ नामक खोपलाई आकस्मिक प्रयोगका लागि अनुमति दिइएको थियो । उक्त खोप नेपालमा अहिले साढे २ लाख बढीले लगाइसकेका छन्। भारत सरकारले सोही खोप नेपाललाई १० लाख डोज अनुदानमा दिएको थियो ।