हेल्थ टिभी अनलाइन \काठमाडौं : नेपालमा ६ वर्षपछि चिकित्सकले लिने अस्पतालको ओपिडी शुल्कमा वृद्धि भएको छ। स्वास्थ्य तथा जनसंख्या मन्त्रालयसँगको यसअघि नै भएको सहमति अनुसार नेपाल चिकित्सक संघ र एसोसिएसन अफ प्राइभेट हेल्थ इन्स्टिच्युसन नेपाल (अफिन) को फागुण ४ गते बसेको बैठकले चिकित्सहरुको ओपीडी शुल्क बढाउने निर्णय गरेको हो।

उक्त बैठकले फागुण ५ देखि लागु हुने गरी ओपिडी शुल्कमा चिकित्सकको अनुभव र योग्यताका आधारमा कम्तीमा ३७० देखि बढीमा ८२५ रुपैयाँसम्म शुल्क लिन पाउने गरी निर्णय गरेको छ । सरकारले वि सं २०७१ साल असोज १ गतेदेखि लागू हुने गरी चिकित्सकको ओपीडी शुल्क निर्धारण गरेको र सो शुल्क प्रत्येक २ वर्षमा पूनरावलोकन हुने गरी समिटी बनाएको भए पनि कुनै काम अघि नबढेको र शुल्क नबढाइएको भन्दै आफूहरुले यस्तो निर्णय गरेको उनीहरुले जनाएका छन्।

उनीहरुले मन्त्रालयसँग भएको सहमति अनुसार नै शुल्क बढाएको समेत जिकीर गरे ।यसरी निर्धारण गरिएको ओपीडीको नयाँ शुल्क अनुसार ५ वर्ष भन्दा कम अनुभव भएका एमबीबीएस र बीडीएस गरेका चिकित्सकले ३७० रुपैयाँ ओपीडी शुल्क र ५ वर्ष भन्दा बढी अनुभव भएकाले ४५० सम्म लिन पाउने छन्।

यसैगरी डिप्लोमा गरेका चिकित्सकले ५ वर्ष भन्दा कम अनुभव भए ५१५ रुपैयाँ र सो भन्दा बढी अनुभव भएमा ५९० सम्म लिन पाउनेछन्। उता एमडी एमएस र एमडीएस गरेका चिकित्सककको हकमा ५ वर्षै अनुभवका आधारमा ६ सय र ७ सय लिन पाउने भएका छन्। डीएम एमसीएच गरेका चिकित्सकले ७ सय रुपैयाँ लिन सक्नेछन्। उता डीएम एमसीएच गरेर ५ वर्ष अनुभव भएकाले ८२५ रुपैयाँ लिन सक्ने छन् भने एमडी, एमएस र एमडीएस गरेर १० वर्ष अनुभव भएका चिकित्सकले पनि ८२५ रुपैयाँ ओपीडी शुल्क लिन सक्नेछन्।