हेल्थ टिभी अनलाइन \काठमाडौं : कोरोना खोप अभियान अन्तर्गत कारागारमा रहेका कैदीबन्दी र त्यहाँ कार्यरत स्वास्थ्यकर्मीलाई पनि कोरोना विरुद्धको खोप दिइएको छ ।

काठमाडौंको सुन्धारास्थित केन्द्रिय कारागार लगायतका कैदी बन्दीहरुलाई खोप दिइएको हो । डा श्रीराम तिवारीको नेतृत्वमा उपत्यकाका केन्द्रिय कारागार, भद्र जेल, डिल्लीबजार कारागार लगायतका केदी बन्दीहरुलाई कोरोना विरुद्धको खोप दिइएको हो ।

पहिलो चरणमा माघ १६ गते केन्द्रिय कारागारमा कार्यरत ४१ जना स्वास्थ्यकर्मीलाई कोरोना विरुद्धको खोप दिएर अभियान शुरु गरिएको थियो । यसैगरी सुन्धारास्थित सेन्ट्रल जेलका १५ सय कैदीहरु, भद्र जेलका १ हजार जना र डिल्लीबजार कारागारमा रहेका ४८० जनालाई कोरोना खोप दिएको जनाइएको छ । भोलिदेखि सुन्धारास्थित महिला जेलमा रहेका ८५० जनालाई कोरोना विरुद्धको खोप दिइँदैछ ।

खोप कार्यक्रमको निरीक्षण गर्न स्वास्थ्य सेवा विभागका महानिर्देशक डा दिपेन्द्र रमण सिंह त्यहाँ स्थित खोप केन्द्रमा पुगेका थिए ।

स्वास्थ्य तथा जनसंख्या मन्त्रालयको निर्णय अनुसार कारागारमा रहेका कैदीबन्दी र वृद्धाश्रममा रहेकालाई पनि खोप लगाउन शुरू गरिएको हो ।