हेल्थ टिभी अनलाइन \काठमाडौं : कोरोना विरुद्धको खोप अभियानको पाँचौ दिनसम्म आइपुग्दा ८८ हजार भन्दा बढीले कोरोना विरुद्धको खोप लगाइसकेका छन्।

स्वास्थ्य तथा जनसंख्या मन्त्रालयले विज्ञप्ति जारी गर्दै खोप अभियान शुरु भएको पाँचौ दिनसम्ममा ८८ हजार ७ जनाले खोप लगाएको जनाएको हो । मन्त्रालयका प्रवक्ता डा जागेश्वर गौतमका अनुसार देशभरका १८५ खोप केन्द्रबाट आज ४ बजेसम्म ७७ वटा जिल्लामा ८८ हजार ७ जनाले खोप लगाइसकेका हुन् । जसमध्ये प्रदेश १ मा १२ हजार ७६३, प्रदेश २ मा ११ हजार ५७ जना, बाग्मतीमा २८ हजार ६८३ जनाले खोप लगाएका छन्। यसैगरी गण्डकीमा १२ हजार ३११ जना, लुम्बिनीमा १० हजार ७६०, कर्णालीमा ५ हजार ५५६ जना र सुदूरपश्चिममा ६ हजार ८७७ जनाले खोप लगाएका हुन्।

मन्त्रालयले अबको ५ दिनभित्र पहिलो चरणमा खोप लगाउने मापदण्डभित्र पर्ने सम्पूर्णलाई नजिकको खोप केन्द्रमा सम्पर्क गरी खोप लगाउन आग्रह समेत गरेको छ । सरकारले खोप अभियान शुरु भएको १० दिनभित्र सक्ने लक्ष्य लिएको छ ।