हेल्थ टिभी अनलाइन \काठमाडौं : नेपाललाई भारतले अनुदानमा दिएको १० लाख डोज कोरोना विरुद्धको खोप आज काठमाडौं आएको छ ।

एयर इन्डियाको विमानबाट कोरोनाविरुद्धको खोप त्रिभुवन अन्तर्राष्ट्रिय विमानस्थलमा आइपुगेको हो । नेपालका लागि भारतीय राजदूत विनय मोहन क्वात्राले स्वास्थ्य तथा जनसंख्या मन्त्री हृदयेश त्रिपाठीलाई एअरपोर्टमै उक्त खोप हस्तान्तरण गरे ।

खोप हस्तान्तरण कार्यक्रममा स्वास्थ्यमन्त्री ह्दयेश त्रिपाठीले भारत आफै कोरोना विरुद्ध लडिरहेका बेला नेपाल र नेपालीका लागि १० लाख डोज खोप सहयोग गर्न तयार हुनु आफैमा ठूलो कुरा भएको भन्दै भारत सरकारलाई धन्यवाद दिए । उता राजदूत क्वात्राले भारत र नेपालको मित्रताको अनुपम उदाहरणको रुपमा खोपलाई लिन सकिने भन्दै परेको बेलामा नेपाललाई हरसम्भव सहयोग गर्न भारत तयार रहेको बताए । खोप एअरपोर्टबाट सिधै स्वास्थ्य सेवा विभागको खोप भण्डारण केन्द्रमा भण्डारणका लागि लगिएको छ ।

सबै खोप त्यही भण्डारण गरिने र आवश्यकता अनुसार सबै प्रदेशमा वितरण हुने स्वास्थ्य सचिव लक्ष्मण अर्यालले जनाए । उनले भने, ‘अहिले सबै खोप केन्द्रीय भण्डारण केन्द्रमा कोल्ड चेन मेन्टेन गरेर राखिन्छ । आवश्यकता र माग अनुसार प्रदेशमा पठाइनेछ । आज प्राप्त भएका खोप पहिलो चरणमा कोरोना विरुद्धको लडाइमा खटिने स्वास्थ्यकर्मी, सफाइकर्मी, सुरक्षाकर्मी, एम्बुलेन्स चालकलाई दिइने समेत उनले जानकारी दिए ।