हेल्थ टिभी अनलाइन\ काठमाडौं : नेपाललाई भारत सरकारले १० लाख डोज कोरोना विरुद्धको खोप प्रदान गरेको छ ।

उक्त खोप भोलि नै नेपाल आइपुग्ने भएको छ । स्वास्थ्य तथा जनसंख्या मन्त्रालय र भारतीय राजदूतावासले संयुक्त रुपमा गरेको पत्रकार सम्मेलनमा स्वास्थ्यमन्त्री ह्दयेश त्रिपाठीले भारतले १० लाख डोज कोरोना खोप अनुदानका रूपमा उपलब्ध गराउने र उक्त खोप भोलि नै काठमाडौं आइपुग्ने बताए ।

उनले खोप पहिलो चरणमा कोरोना महामारीमा खटिएका स्वास्थ्यकर्मी, सफाईकर्मी, एम्बुलेन्सका चालक लगायतका कर्मचारीलाई दिइने जनाए । त्यसको लागि सम्पूर्ण तयारी पूरा भइसकेको समेत उनले जिकीर गरे ।

उनले नेपाल र भारतको मित्रताका कारण खोप आएको भन्दै भारत सरकारलाई धन्यवाद समेत दिए ।

उता नेपालका लागि भारतीय राजदूत विनय मोहन क्वात्राले नेपालीका लागि यो भारत सरकारको ‘गिफ्ट’ भएको भन्दै आवश्यक परेमा अझै सहयोग गर्ने समेत जनाए । भारतले यही जनवरी १६ देखि कोरोना विरुद्धको खोप दिन शुरु गरेको र त्यसको एक साता पनि नबित्दै नेपाललाई खोप उपलब्ध गराउनु दुई देशको मित्रताको अनुपम उदाहरण भएको समेत क्वात्राले जिकीर गरे ।