हेल्थ टिभी अनलाइन \काठमाडौं : काठमाडौंको मीनभवनस्थित सुस्वास्थ्य हस्पिटल छैटौँ वर्षमा प्रवेश गरेको छ । प्राृकतिक चिकित्सा क्षेत्रमा छुट्टै पहिचान बनाउन सफल सुस्वास्थ्य हस्पिटलले योवीचमा झण्डै १० हजार भन्दा बढी बिरामीलाई सेवा प्रदान गरेको हस्पिटलका अध्यक्ष सुदर्शन बस्नेतले जनाए ।

हस्पिटलमा विशेष गरी नसा च्यापिएका बिरामी, हड्डी खिइएका, हाडजोर्नी समस्या भएका, पक्षघात भएका, माइग्रेन, अनिद्रा, डिप्रेसन आदीका बिरामी आउने गरेको पनि उनले जानकारी दिए ।

नसा च्यापिएका बिरामीको उपचारमा हस्पिटलले ९० प्रतिशत सफलता पाएको बस्नेतले जनाएका छन्। हस्पिटलले आफ्नो सामाजिक उत्तरदायित्व बहन गर्दै विभिन्न स्थानमा गएर जनचेतनामूलक कार्यक्रम गर्ने मात्र होइन नि: शुल्क स्वास्थ्य शिविरहरु समेत गर्दै आएको छ । यो पाँच वर्षको अवधिमा हस्पिटलले देशका विभिन्न स्थानमा गएर नि: शुल्क स्वास्थ्य शिविर गरेको र त्यसबाट ५ हजार भन्दा बढी बिरामीले नि: शुल्क सेवा लिएको जनाइएको छ ।

कोरोना महामारीका कारण हस्पिटल प्रांगणमा सिमीत कर्मचारी र बिरामीबीच वार्षिकोत्सव मनाइएको थियो । वार्षिकोत्सवको अवसरमा आयोजित कार्यक्रममा हस्पिटलका अध्यक्ष बस्नेतले आगामी दिनमा सातै प्रदेशमा शाखा स्थापना गरी सेवा विस्तार गर्दै लाने योजना रहेको समेत जनाए ।