हेल्थ टिभी अनलाइन \काठमाडौं : बेलायतबाट आएका ५ जनामा कोरोना भाइरसको संक्रमण पुष्टि भएको छ ।

इपिडिमियोलोजी तथा रोग नियन्त्रण महाशाखाका निर्देशक डा बासुदेव पाण्डेले हेल्थ टिभी अनलाइनसँग कुरा गर्दै भने, ‘बेलायतबाट आएका र हाम्रो सम्पर्कमा भएका १९३ जनामध्ये ५ जनामा कोरोना संक्रमण पुष्टि भएको हो ।’ लक्षण सहित आएका उनीहरुमा परीक्षण गर्दा कोरोना पुष्टि भएको  छ । त्यसैले उनीहरु पुरानै भाइरसको संक्रमणमा परेको देखिन्छ ।’

उनले नयाँ भाइरसको संक्रमण भएका बिरामीमा लक्षण हुँदा पनि कोरोना नेगेटिभ आएमा मात्र शंका गरेर परीक्षण गर्ने हो । उहाँहरुमा त स्पष्ट लक्षण छ र हाम्रो मेशिनले पोजेटिभ देखाएको छ । कसरी नयाँ प्रकारको भाइरस हुन्छ उनले प्रश्न गरे ।  डा पाण्डेले नयाँ भाइरस हो होइन परीक्षण गर्न जिन सिक्वेन्सिङ गर्नपर्ने र त्यसका लागि बाहिर नै पठाउनुपर्ने बताए ।

यही बेला केही मिडियाले नयाँ भाइरस भेटियो भनेर लेखेको भन्दै यसरी कुरै नबुझी त्रास नफैलाउन समेत उनले आग्रह गरे । नयाँ पुरानो भन्ने थप परीक्षण नगरी थाहा नहुने समेत उनले जिकीर गरे । त्यसैले हल्लाको पछि लागेर नआत्तिन पनि उनले सर्वसाधारणलाई आग्रह गरेका छन्।

बेलायतमा नयाँ प्रकारको कोरोना भाइरसको संक्रमण फैलिरहेकाले नेपालले त्यहाँबाट आउनेको अनिवार्य पीसीआर परीक्षण गर्न र १० दिन होटल क्वारेन्टाइनमा बस्न सूचना जारी गरेको थियो ।