शेर भण्डारी \डडेल्धुरा : सुदूरपश्चिममा संघीय सरकार मातहतको एक मात्र डडेल्धुरा अस्पतालले भेन्टिलेटरसहित मेडिकल आईसीयू उपचार सेवा सुरु गरेको छ। अस्पतालले ११ वेडको आइसीयू र ४ वटा भेन्टिलेटरसहितको उपचार सेवा सुरू गरेको हो।

संघीय सरकारको बजेटमा १५ वटा आइसीयू सञ्चालन गर्ने भनिएता पनि भवन अभावका कारण हाललाई ५ वेडको आइसीयू सेवा सुरू गरेको डडेल्धुरा अस्पतालले जनाएको छ। आइसीयूमा उपचारको मूल्य भने सरकारी अस्पतालहरुले लिए बराबर नै तोकिने अस्पताल विकास समितिका अध्यक्ष करुणाकर ओझाले बताए।

अस्पतालले एक हप्ताभित्र ६ वेडको आइसियू थप गर्ने तयारी थालेको अध्यक्ष ओझाको भनाइ छ। जसमा ३ वटा कोरोना विशेष बिरामीका लागि र ३ वटा सर्जिकल आइसीयू थप हुने तयारीमै रहेको उनले बताए।

‘स्थापना भएको ११ वेडको आइसीयू सञ्चालनका लागि जनशक्ति समेत उपलब्ध रहेको छ। अहिले अस्पतालले डडेल्धुरा बाहिर गएर उपचार गर्ने नसक्ने तथा गरिब समुदायका परिवारका बिरामीलाई सकेसम्म यहाँ नै उपचारको पहिलो प्राथमिकता दिनेछौँ,’उनले भने।

संघीय सरकारले आइसीयू सेवा विस्तारका लागि ३ करोडको बजेट उपलब्ध गराएको थियो। सुदुरपश्चिमका पहाडि जिल्लाको केन्द्रका रुपमा रहेको डडेल्धुरा अस्पतालमा आइसीयू सेवा सञ्चालन भएसँगै पहाडि सात जिल्लाका बिरामीलाई उपचारका लागि सहज हुने भएको छ।