हेल्थ टिभी अनलाइन \काठमाडौं :  स्वास्थ्य तथा जनसंख्या मन्त्रालयले कोरोना संक्रमितको उपचार तथा परीक्षणमा खटिएका स्वास्थ्यकर्मीको जोखिम भत्ता नरोक्न अस्पतालहरुलाई निर्देशन दिएको छ ।

वीर अस्पताल लगायतका केही अस्पतालका स्वास्थ्यकर्मीले जोखिम भत्ता नपाएको भन्दै आन्दोलन समेत गरिरहेका बेला मन्त्रालयले यस्तो सूचना जारी गरेको हो । मन्त्रालयले कोरोना उपचार र परीक्षणमा खटिएका स्वास्थ्यकर्मीका लागि भत्ता वापतको रकम निकासा भइसकेकाले सो रकम उपलब्ध गराउन निर्देशन दिएको हो ।

मन्त्रालयले कोभिड अस्पतालहरुलाई कोभिड -१९ का संक्रमितहरुको उपचार वापत अस्पताललाई अनुदान उपलब्ध गराउने आदेश २०७७ बमोजिम  संक्रमितको प्रति बिरामी प्रति दिनका हिसाबले असोज मसान्तसम्मको ६६ करोड ८७ लाख ४५ हजार रुपैंया निकासा भइसकेको जनाएको छ ।

जोखिम भत्ता पनि त्यसमै समावेश भएकाले स्वास्थ्यर्मीलाई जोखिम भत्ता तुरुन्त दिन मन्त्रालयले निर्देशन दिएको हो । आज सचिवस्तरीय निर्णय गर्दै यस्तो निर्देशन गरिएको हो ।