हेल्थ टिभी अनलाइन \काठमाडौं : नेपालमा कोरोना (कोभिड -१९ को) आशंकामा हालसम्म १६ लाख बढी  मानिसको पीसीआर परीक्षण भएको छ ।

स्वास्थ्य तथा जनसंख्या मन्त्रालयको तथ्यांक अनुसार आइतबारसम्म नेपालमा देशभर रहेका ७६ वटा प्रयोगशालामा १६ लाख ९ हजार ७९ जनाको पीसीआर परीक्षण भएको हो । यी मध्ये हालसम्म २ लाख ९ हजार ७७६ जनामा कोरोना भाइरसको संक्रमण पुष्टि भएको छ ।

मन्त्रालयका अनुसार कुल संक्रमितमध्ये १ लाख ७३ हजार ४३० जना संक्रमणमुक्त भइसकेका छन् । यसैगरी हाल देशभर ३५ हजार १२५ जना सक्रिय संक्रमित रहेको र उनीहरु होम आइसोलेसन र संस्थागत आइसोलसनमा रहेको पनि मन्त्रालयले जनाएको छ ।

नेपालमा कोरोना संक्रमण भएकाहरुबाट निको हुने दर ८२ दशमलब ७ प्रतिशत रहेको छ भने मृत्यु दर शुन्य दशमलब ६ प्रतिशत रहेको छ । मन्त्रालयका अनुसार नेपालमा महिला भन्दा बढी पुरुष संक्रमित धेरै रहेका छन्। महिलाको संक्रमण प्रतिशत जम्मा ३४ रहेको छ भने पुरुषहरुको ६६ रहेको छ ।

नेपालमा हालसम्म १२ सय २१ जनाको कोरोना संक्रमणबाट मृत्यु भएको छ ।