हेल्थ टिभी अनलाइन \चितवन : कोरोना संक्रमण भएर होम आइसोलेसनमा बसेका थप एक जनाको मृत्यु भएको छ ।

चितवनको भरतपुर महानगरपालिका ७ का ५७ वर्षीय पुरुषको बिहिबार राती मृत्यु भएको भरतपुर अस्पतालले जनाएको छ । असोज २६ गते कोरोना संक्रमण पुष्टि भएका उनमा सामान्य लक्षण देखिएकाले चिकित्सकले घरमै बस्न सल्लाह दिएको बताइएको छ । हिजो एक्कासी श्वासप्रश्वासमा समस्या भएपछि अस्पताल लगिएको भए पनि उनको उपचारकै क्रममा मृत्यु भएको हो । अस्पतालले सिभियर कोभिड १९ र निमोनियाका कारण उनको मृत्यु भएको जनाएको छ ।

पछिल्लो समय होम आइसोलेसनमा रहेको संक्रमितको एक पछि अर्को गर्दै मृत्यु हुन थालेको छ । सामान्य लक्षण देखिंदा अस्पताल नजाने र कडा लक्षण देखिने बेलासम्म संक्रमितको फोक्सो लगायतका अंगमा धेरै नै क्षति पुगिसकेको हुने चिकित्सकहरुले बताएका छन्।

सरकारले सामान्य लक्षण देखिएका संक्रमितलाई होम आइसोलेसनमा बस्न आग्रह गर्दै आएको छ ।