हेल्थ टिभी अनलाइन \काठमाडौं : सरकारले दशैंको बिदाका दिनमा पनि कोरोना परीक्षण तथा उपचार सेवा सूचारु हुने जनाएको छ ।

स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले दशैंका बेलामा पनि कोरोना संक्रमितको उपचार र परीक्षण सेवामा अवरोध नहुने बताए । डा गौतमले बुधबारको मिडिया ब्रिफिङमा कोरोना संक्रमितको संख्या बढिरहेकोले यो बेला पनि परीक्षण र उपचार सेवा आवश्यकता अनुसार सञ्चालन गर्ने गरी व्यवस्था मिलाइएको जानकारी दिए।

दशैंमा कोरोना संक्रमणको जोखिम बढी हुने भएकाले जो जहाँ छ त्यहीं बसेर यसपालीको दशैं मनाउन सरकारले आग्रह गर्दै आएको छ ।

आज मात्रै देशभर ५ हजार ७४३ जना नयाँ कोरोना संक्रमित थपिएका थिए । योसँगै नेपालमा कुल कोरोना संक्रमितको संख्या १ लाख ४४ हजार ८७२ पुगेको छ । यसैगरी हाल देशभर ४४ हजार ४७६ जना सक्रिय संक्रमित रहेका छन्।