हेल्थ टिभी अनलाइन \बाँके : बाँकेमा कोरोना संक्रमणबाट १५ वर्षीय किशोरसहित थप दुई जनाको मृत्यु भएको छ । स्वास्थ्य कार्यालय बाँकेले विज्ञप्ति जारी गर्दै ३८ वर्षीय पुरुष र १५ वर्षीय किशोरको मृत्यु भएको जनाएको हो ।

स्वास्थ्य कार्यालयका प्रमुख नरेश श्रेष्ठका अनुसार यसरी मृत्यु हुनेहरुमा बाँके कोहलपुर वडा नं ९ पिपरीका ३८ वर्षीय पुरुषको शुक्रबार राती ११ बजे भेरी अस्पतालमा उपचारका क्रममा मृत्यु भएको हो उनमा असोज १३ गते कोरोना पुष्टि भएको थियो ।

यसैगरी नेपालगञ्ज मेडिकल कलेज शिक्षण अस्पताल कोहलपुरमा उपचाररत दाङका १५ वर्षीय किशोरको पनि हिजो शुक्रबार राती मृत्यु भएको हो । उनी दाङ घोराही उपमहानगरपालिका वडा नं ३ हुन्। उनलाई असोज १९ गते कोरोना पुष्टि भएको थियो ।

योसँगै कोरोना संक्रमणबाट बाँकेमा मृत्यु हुनेको संख्या २४ पुगेको छ भने बाहिरी जिल्लाबाट उपचारका लागि बाँके आएका १२ जन संक्रमितको मृत्यु भइसकेको स्वास्थ्य कार्यालय बाँकेका कोरोना फोकल पर्सन नरेश श्रेष्ठले बताए ।