हेल्थ टिभी अनलाइन \काठमाडौं : सरकारले निजी स्तरबाट संचालित ल्याबहरुलाई पीसीआर परीक्षण शुल्क समायोजनका लागि २४ घण्टे अल्टिमेटम दिएको छ ।

स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले भदौ २८ गतेको निर्णय अनुसार सबै ल्याबले २ हजार रुपैयाँमा पीसीआर परीक्षण गर्नुपर्ने भए पनि ८ वटा ल्याबले तोकिएको भन्दा बढी रकम लिएको पाइएको बताए । उनले नेपाल मेडिसिटी, ह्याम्स अस्पताल, बी एण्ड बी अस्पताल, सीडीएल, सुर्या ल्याब लगायतका ८ वटा निजी ल्याबलाई शुल्क समायोजनका लागि २४ घण्टा समय दिएको र यो समयमा पनि शुल्क समायोजन नगरेमा प्रयोगशालाको परीक्षण गर्न पाउने स्वीकृति खारेज गरिने जनाए । उनले सरकारको निर्णयमा अटेरी गरेमा कालोबजारी गरेको आरोपमा यी ल्याब बन्द गर्ने र हदैसम्मको कारवाहीको लागि सिफारिस गर्ने समेत बताए ।

सरकारले शुरुमा कोरोनाको पीसीआर शुल्क ५ हजार ५ सय रुपैयाँ तोकेको थियो । पछि सो शुल्क समायोजन गर्दै ४ हजार ४ सय बनायो र भदौ २८ गते अर्को निर्णय गर्दै देशभरका सबै ल्याबले २ हजार रुपैयाँमा पीसीआर गर्नुपर्ने सूचना जारी गरेको थियो ।

तर यो निर्णयमा निजी स्तरका ल्याब संचालकले विरोध जनाएका थिए र उनीहरुले सरकारले तोकेको यो शुल्कमा पीसीआर परीक्षण गर्न नसकिने भन्दै स्वास्थ्य मन्त्रालयमा विज्ञिप्त समेत बुझाएका थिए । उनीहरुले ३ हजार ८९९ रुपैयाँ सम्ममा परीक्षण गर्नसक्ने भन्दै सो रकममा परीक्षण गर्दै आएका थिए ।