हेल्थ टिभी अनलाइन\ काठमाडौं : हाल नेपालका ६ वटा जिल्ला कोरोना संक्रमित शून्य जिल्ला भएका छन्। स्वास्थ्य तथा जनसंख्या मन्त्रालयका अनुसार देशका ६ जिल्लाका सबै कोरोना संक्रमित निको भएपछि यी जिल्ला संक्रमित शून्य जिल्ला घोषित भएका हुन्।

कोरोना संक्रमित शून्य जिल्लाहरुमा सोलुखुम्बु, रसुवा, मुस्ताङ, डोल्पा, मुगु र हुम्ला रहेको मन्त्रालयका प्रवक्ता डा जागेश्वर गौतमले जनाएका छन्। यी जिल्लाहरुका सबै संक्रमित निको भएर आइसोलसनबाट डिस्चार्ज भइसकेका छन्।

त्यसो त कोरोना संक्रमित नेपालका ७७ वटै जिल्लामा देखा परेका थिए । तर अन्य जिल्लामा सक्रिय संक्रमित अहिले पनि रहेका छन् भने यी ६ जिल्लामा एक जना पनि सक्रिय संक्रमित छैनन्।

नेपालमा हालसम्म देभरभर १८ हजार ४३७ जना सक्रिय संक्रमित रहेका छन्। त्यसैगरी कोरोना जितेर निको हुनेको संख्या ५० हजार ४११ पुगेको मन्त्रालयले जनाएको छ । यी सबै गरेर नेपालमा कुल कोरोना संक्रमितको संख्या ६९ हजार ३०१ पुगेको छ भने हालसम्म ४५३ जनाको कोरोना संक्रमणबाट मृत्यु भएको छ ।