हेल्थ टिभी अनलाइन \काठमाडौं : सरकारले एम्बुलेन्स बिरामी बोक्नेबाहेक अन्य काममा प्रयोग भएको पाइएमा एम्बुलेन्सको दर्ता नै खारेज गर्ने चेतावनी दिएको छ ।

स्वास्थ्य तथा जनसंख्या मन्त्रालयलका प्रवक्ता डा जागेश्वर गौतमले एम्बुलेन्स अन्य प्रयोजनमा प्रयोग भएको पाइएको भन्दै बिरामी बोक्नेबाहेक अन्य काममा प्रयोग भएको पाएमा उक्त एम्बुलेन्सको तुरुन्त दर्ता खारेज गर्ने बताएका हुन्।

उनले एम्बुलेन्स सञ्चालन सम्बन्धी मापदण्ड अनुसार बिरामी मात्र ओसारपोसार गर्न एम्बुलेन्स संचालकलाई आग्रह गरे । मापदण्ड विपरित एम्बुलेन्सको दुरुपयोग गरेको पाइएमा उक्त एम्बुलेन्स सञ्चालन गर्ने संस्थालाई भविश्यमा पनि एम्बुलेन्स सञ्चालन गर्न नदिने गरी दर्ता खारेज गर्ने बताए ।

पछिल्लो समय लकडाउनका कारण मानिसलाई आवतजावतमा समस्या भएपछि धेरै एम्बुलेन्सले चर्को पैसा लिएर उनीहरुलाई यताउता लैजाने गरेको गुनासो आएपछि मन्त्रालयले यस्तो निर्णय गरेको हो ।