हेल्थ टिभी अनलाइन\ काठमाडौं : औषधि व्यवस्था विभागले विषाक्त रसायन मेथानल मिसाइएका ह्यान्ड सेनिटाइजर भेटिएको जनाएको छ ।

विभागले बजारमा बिक्री वितरणमा रहेका ह्यान्ड सेनिटाइजरको नमुना संकलन गरी राष्ट्रिय औषधि प्रयोगशालामा परीक्षण गर्दा तोकेको मापदण्ड ‘इन्स्ट्यान्ट ह्यान्ड सेनिटाइजर अल्कोहल बेस्ड सम्बन्धी स्तर -२०७६ ‘ विपरित रसायन मिथानल समावेश भएको पाइएको जनाएको छ । मानव स्वास्थ्यमा गम्भीर असर पर्ने हुँदा सर्वसाधारणलाई यस्ता सेनिटाइजर प्रयोग नगर्न \नगराउन हुन आग्रह गरेको छ ।

साथै यस्ता सेनिटाइजरको उत्पापदन तथा विक्री वितरण अविलम्ब रोक्न सम्पूर्ण सरोकावालालाई सूचित गरिएको भन्दै विभागले आज सूचना जारी गरेको छ ।

भक्तपुरमा रहेको कायाकल्प उद्योग, काठमाडौंको हाइजिन सोप एण्ड केमिकल प्रा. लि., आधार केमिकल एण्ड फुड इन्डष्ट्री प्रा लि, सर्च केम हर्बल प्रडक्ट र सुर्यमुखी हर्बल प्रडक्टले उत्पादन गरेका सेनिटाइजरमा विषाक्त रसायन भेटिएको विभागले जनाएको छ ।