हेल्थ टिभी अनलाइन \काठमाडौं : पछिल्लो समय केही व्यक्तिहरुले आफूलाई प्राकृतिक चिकित्सक हुँ भन्ने दाबी गर्दै सर्वसाधारणमा कोरोनाका विषयमा भ्रम फैलाउने गरेको भन्दै प्राकृतिक चिकित्सक संघले आपत्ति जनाएको छ ।

विज्ञप्ति जारी गर्दै योग तथा प्राकृतिक चिकित्सक संघ नेपालले केही गैर चिकित्सकले प्राकृतिक चिकित्साका नाममा भ्रम फैलाउने र नकारात्मक धारणा सिर्जना गराउने खालका अभिव्यक्तिहरु दिएकोमा उनीहरुलाई कारवाहीको दायरामा ल्याइनुपर्ने माग गरेको छ ।

यसका साथै प्राकृतिक चिकित्सक हुँ भनेर दावी गरिएका व्यक्तिहरु  नेपाल स्वास्थ्य व्यवसायी परिषदमा समेत दर्ता नभएकाले उनीहरुको कुरा आधिकारीक नभएको र उनीहरुले मनोमानी रुपमा व्यक्त गरेका कुरा विश्वास नगर्न पनि संघले सर्वसाधारणलाई आग्रह गरेको छ ।

संघले कुनै पनि व्यक्तिले आफूलाई विशेषज्ञ बताइसकेपछि सो व्यक्ति विशेषज्ञ भए नभएको एकिन गरेर मात्र उसका कुराहरु सम्प्रेषण गरिदिन मिडियालाई पनि आग्रह गरेको छ ।