हेल्थ टिभी अनलाइन \काठमाडौं : सरकारले एक जनामा कोरोना संक्रमण भएको पत्ता लगाउन एक लाख ४ हजार ६३० रुपैयाँ खर्च गर्न परेको जनाएको छ ।

स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले आज भएको मिडिया ब्रिफिङमा एक जनामा कोरोना पोजेटिभ भएको पत्ता लगाउन १ लाख ४ हजार ६३० रुपैयाँ खर्च भएको बताएका हुन्। डा गौतमले हालसम्म ५ लाख ७९ हजार ८९९ जनाको पीसीआर परीक्षण गरिएकोमा ३० हजार ४८३ जनामा कोरोना संक्रमण पुष्टि भएको जनाए ।

हालसम्म कोरोना पत्ता लगाउन गरिएको पीसीआर परीक्षणमा मात्रै सरकारको ३ अर्ब १८ करोड ९४ लाख ४४ हजार ५ सय रुपैयाँ खर्च भइसकेको उनले जानकारी दिए । उनले यो रकम स्वास्थ्यकर्मीले लगाउने पीपीईमा लाग्ने खर्च बाहेक रहेको जनाएका छन्।

डा गौतमले एक जनाको लागि लाग्ने ५ हजार ५ सयका दरले पीसीआर परीक्षण गर्दा यो खर्च आएको जनाएका छन्। उनले एक जना संक्रमितलाई ३० दिन आइसीयूमा राख्न पर्दा ४ लाख ५० हजार खर्च हुने बताए । उनले कोरोनाको परीक्षण र उपचारमा बस्दा धेरै खर्च हुने हुँदा पनि हामी यसबाट बच्न नै  सजग हुनुपर्नेमा जोड दिए ।