हेल्थ टिभी अनलाइन \काठमाडौं : काठमाडौं उपत्यकामा आजदेखि निषेधाज्ञा जारी गरिएको छ । काठमाडौं, भक्तपुर र ललितपुरमा गएराति १२ बजेदेखि निषेधाज्ञा जारी गरिएको हो ।  निषेधाज्ञाका क्रममा अत्यावश्यक बाहेकका सबै गतिविधिहरुमा निषेध गरिएको छ । तीनै जिल्लाका प्रमुख जिल्ला अधिकारीहरुको मंगलबार बसेको संयुक्त बैठकले गएराति १२ बजेदेखि लागु हुने गरी अत्यावश्यक बाहेकका गतिविधि निषेध गर्ने गरी आदेश जारी गरेको थियो ।

काठमाडौं उपत्यकामा जारी गरिएको निषेधाज्ञा भदौ १० गते राति १२ बजेसम्म कायम रहनेछ । निषेधाज्ञाको समयमा सर्वसाधारणलाई बाटोमा हिंड्न समेत रोक लगाइएको छ । अत्यावश्यक सेवा तथा वस्तुबाहेकका अन्य सबै प्रकारका व्यापार, व्यवसाय सञ्चालन गर्न निषेध गरिएको हो । काठमाडौं उपत्यकामा कोरोनाको उच्च जोखिम बढ्दै गएको भन्दै सरकारले उपत्यकामा कडा निषेधाज्ञा जारी गर्ने निर्णय गरेको हो ।

निषेधाज्ञा जारी भएको समयमा अत्यावश्यक सेवा बाहेक कलकारखाना, सवारीसाधन, कार्यालय सबै ठप्प हुनेछन्। अत्यावश्यक काममा हिंड्नेलाई  पनि मास्क अनिवार्य  गरिएको छ ।

आज परेको दर खाने दिन एवं तीजमा मठ मन्दिरमा महिलाहरुको भिडभाड हुने सम्भावनालाई मध्यनजर गर्दै प्रशासनले एक साताका लागि निषेधाज्ञा जारी गरेको हो । जनस्वास्थ्य विज्ञहरुले काठमाडौं उपत्यकालाई कोरोनाको उच्च जोखिम भएको क्षेत्रमा राख्दै बढी सतर्कता अपनाउन सुझान दिंदै आएका छन्।

नेपालमा हालसम्म २८ हजार बढी मानिसमा संक्रमण पुष्टि भएको छ भने १२० जनाले कोरोनाबाट ज्यान गुमाएका छन्।