हेल्थ टिभी अनलाइन \काठमाडौं : ललितपुरको भैँसेपाटीस्थित नेपाल मेडिसिटी अस्पतालमा उपचाररत एक जना कोरोना संक्रमितको मृत्यु भएको छ । काठमाडौंका ६४ बर्षीय पुरुषको आज बिहान मृत्यु भएको हो ।

स्वास्थ्य कार्यालय ललितपुरका प्रमुख डा खगेश्वर गेलालले  काठमाडौं कलंकी निवासी ६४ वर्षीय पुरुषको आज बिहान निधन भएको पुष्टि गरे ।

निमोनियाका कारण झण्डै एक महिनाअघि असार ३१ देखि मेडिसिटीमा भर्ना भएर उपचार गराइरहेका उनमा साउन १९ गते कोरोना पोजेटिभ आएको थियो । आज उपचारकै क्रममा उनको मृत्यु भएको छ ।

हेल्थ टिभी अनलाइनले अस्पतालसँग बिहानैदेखि यसबारेमा बुझ्न खोज्दा अस्पतालका जिम्मेवार व्यक्तिले नै आफनो अस्पतालमा कोरोना संक्रमित नै नरहेको र मृत्युको हल्ला मात्र भएको जानकारी दिएका थिए ।

त्यसो त मेडिसिटी अस्पतालले कोरोना संक्रमण भएका विरगञ्जका मेयर विजय सरावगीलाई पनि आफनो अस्पतालमा राखेर उपचार गरिरहेको खुल्न आएको छ ।