हेल्थ टिभी अनलाइन \काठमाडौं : वीर अस्पतालमा भर्ना भएका एक बिरामीमा कोरोना संक्रमण पुष्टि भएको छ ।

रौतहटबाट आएर शल्यक्रियाका लागि भर्ना भएका एक बिरामीमाा कोरोना पुष्टि भएको अस्पताल स्रोतले बताएको छ । शल्यक्रिया गर्नुअघि पीसीआर परीक्षण गर्दा बुधबार उनमा कोरोना पोजेटिभ रिपोर्ट आएको हो ।

उनी सँगै बुधबार परीक्षण गरिएकामध्ये ७ वटा नमुना पोजेटिभ आएको छ । सात जनामध्ये ५ जना एकै फ्याक्ट्रीमा काम गर्ने रहेको पनि बताइएको छ । काठमाडौंको एक फ्याक्ट्रीमा काम गर्ने र समूहमा बस्ने उनीहरुका एक जना साथीलाई केही दिनअघि कोरोना देखिएपछि उनीहरु पनि परीक्षण गर्न वीर अस्पताल आएका थिए । कोरोना रिपोर्ट पोजेटिभ आएकोबारे इपिडिमियोलोजी तथा रोग नियन्त्रण महाशाखालाई जानकारी गराइएको अस्पतालले जनाएको छ ।

अर्का एक जना भने कुनै पनि ट्राभल हिस्ट्री नभएका र सामान्य रुघाखोकी लागेर आफै परीक्षण गराउन आएका स्थानीय भएको बताइएको छ ।

आज मात्रै काठमाडौं उपत्यकामा ६२ जना नयाँ कोरोना संक्रमित थपिएका छन्।