हेल्थ टिभी अनलाइन\काठमाडौं: नेपालमा थप ४८२ जनामा कोरोना संक्रमण पुष्टि भएको छ ।

स्वास्थ्य तथा जनसंख्या मन्त्रालयको नियमित मिडिया ब्रिफिङमा मन्त्रालयका प्रवक्ता डा जागेश्वर गौतमले आज विभिन्न जिल्लामा गरी थप ४८२ जनामा कोरोना पुष्टि भएको बताएका हुन्। योसँगै नेपालमा कोरोना संक्रमितको संख्या १४ हजार ४६ पुगेको छ ।

मन्त्रालयका अनुसार बुधबारसम्म क्वारेन्टाइनमा बस्नेको संख्या ४८ हजार ३६२ रहेको छ । यसैगरी कोरोना संक्रमण भएर विभिन्न आइसोलेसन सेन्टरमा रहनेको संख्या ९ हजार ३६० रहेको मन्त्रालयले जनाएको छ ।

आज कोरोनाबाट मृत्यु हुनेको संख्यामा एक जना थपिएका छन्। अछामको बयालपाटा अस्पतालमा आइतबार मृत्यु भएका एक पुरुषमा मंगलबार कोरोना पुष्टि भएको हो । योसँगै नेपालमा कोरोना संक्रमणबाट मृत्यु हुनेको संख्या ३० पुगेको छ ।