हेल्थ टिभी अनलाइन\काठमाडौं : नेपाल क्यान्सर सर्भाइभर्स सोसाइटीले क्यान्सर पीडित दिना परियारलाई १० हजार रुपैयाँ आर्थिक सहयोग गरेको छ ।

नेपालगंज खजुराकी २४ वर्षीया क्यान्सर पीडित दिना परियारले अस्पतालमा उपचार खर्च तिर्न नसकेर डिस्चार्ज हुन नसकेको समाचार आइतबार हेल्थ टिभी अनलाइनमा प्रकाशित भएको थियो । त्यही समाचार प्रकाशित भएपछि सर्भाइभर्स सोसाइटीकी अध्यक्ष प्रमिता खनालले सम्पर्क गरी आज शिक्षण अस्पताल पुगी १० हजार रुपैयाँ सहयोग गरेकी हुन्। सहयोग रकम हस्तान्तरण गर्दै खनालले तत्कालका लागि यति सहयोग गरेको भए पनि आगामी दिनमा अन्य सहयोग गर्ने आश्वासन समेत दिईन्।

दिना १० महिनादेखि त्रिवि शिक्षण अस्पताल महाराजगञ्जमा भर्ना भएर क्यान्सरको उपचार गराउँदै आएकी छिन्। उनको उपचार पूरा भएको र अब अस्पताल बस्नुपर्ने बाध्यता नरहेको भन्दै डाक्टरले डिस्चार्ज हुन बारम्बार भने पनि उपचार खर्च तिर्न नसक्दा डिस्चार्ज हुन सकेकी छैनन्। उनले आफूलाई अस्पातालबाट निस्कन सहयोग गरिदिन सबैसँग अनुरोध गरेकी छिन्।