हेल्थ टिभी अनलाइन\डडेल्धुरा : सुदूरपश्चिममा आज थप १ सय ३७ जनामा कोरोना संक्रमण पुष्टि भएको छ। राष्ट्रिय जनस्वास्थ्य प्रयोगशाला टेकुमा गरिएको परीक्षणमा बिहीबार थप १ सय ३७ जनामा कोरोना पुष्टि भएको हो।

बिहीबार थपिएका संक्रमित मध्ये डडेल्धुराका ८३, अछाममा २९ र बैतडीका २५ जना रहेका छन्। डडेल्धुरा जिल्लामा थप ८३ जनामा कोरोना पुष्टि भएको डडेल्धुराका कोभिड–१९ सम्पर्क व्यक्ति हरीप्रशाद भट्टले बताए।

भारतबाट स्वदेश फर्केर विभिन्न क्वारेन्टाइनमा बसेका र यसअघि आरडीटी रिपोर्ट पोजेटिभ देखिसकेका २५ जनाको पीसीआर रिपोर्ट पनि पोजेटिभ आएको स्वास्थ्य कार्यालय बैतडीका प्रमुख योगेशप्रसाद भट्टले जानकारी दिए।

दशरथचन्द नगरपालिका १० जना, सिगास गाउँपालिकाका ६ जना, पञ्चेश्वर गाउँपालिकाका ४ जना, सुर्नया गाउँपालिकाका ३ जना र पाटन नगरपालिकाका २ जनामा कोरोना पुष्टि भएको हो। नयाँ संक्रमित २५ जना मध्ये २ जना महिला र २३ जना पुरुष रहेका छन्।

नयाँ थपिएका संक्रमितहरु क्वारेन्टाइनमै रहेको जानकारी आएको र उनीहरुको स्वास्थ्य अवस्था हेरेर आइसोलेसनमा राखिने स्वास्थ्य कार्यालयका प्रमुख भट्टले जानकारी दिए। अछाम जिल्लाको मेल्लेख गाउँपालिकामा २३ जना र सांफेबगर नगरपालिकामा ६ जना नयाँ संक्रमित फेला परेको स्वास्थ्य कार्यालय अछामका प्रमुख झनक ढुंगानाले बताए।

सुदूरपश्चिममा एउटा मात्रै प्रयोगशाला रहेकाे र  स्वाबको चाप बढ्दै गएपछि २ हजार ६६ जनाको स्वाब परीक्षणका लागि काठमाडौँ पठाईएको थियो ।