हेल्थ टिभी अनलाइन\ काठमाडौं:  नेपालगञ्ज मेडिकल कलेज कोहलपुरमा उपचारका क्रममा मृत्यु भएका अर्का एक व्यक्तिमा पनि कोरोना संक्रमण पुष्टि भएको छ । मंगलबार मृत्यु भएकी ४३ बर्षिया महिलामा आज कोरोना संक्रमण पुष्टि भएको भेरी अस्पताल नेपालगञ्जले जनाएको छ ।

उनको मंगलबार मृत्यु भएपछि कोरोना परीक्षणका लागि स्वाब लिइएको थियो । मेडिकल कलेज कोहलपुरका सह निर्देशक डाक्टर नितेश कनोडियाले मृत्यु भएकी महिला कैलाली लम्कीचुहा नगरपालिका २ की भएको बताए । महिलाको टाउकोमा गम्भीर चोट लागेपछि उनलाई जेठ ३१ गते मेडिकल कलेज कोहलपुरमा भर्ना गरिएको थियो ।

गम्भीर अवस्थामा अस्पताल आएकी उनको आइसीयुमा राखेर उपचार भइरहेको थियो । योसँगै दुई दिनको अवधिमा उक्त मेडिकल कलेजमा मृत्यु भएका दुई महिलामा कोरोना संक्रमण पुष्टि भएको छ । हिजो मात्र बाँके वैजनाथकी ४६ वर्षीय महिलाको मृत्युपछि कोरोना पुष्टि भएको थियो ।