हेल्थ टिभी अनलाइन\ काठमाडौं : नेपालमा कोरोना संक्रमणबाट मृत्यु हुनेको संख्या १८ पुगेको छ ।

वीरगञ्जका १ र बाराका १ गरी आज दुई जना व्यक्तिको कोरोनाका कारण मृत्यु भएको पुष्टि भएको हो । मन्त्रालयका अनुसार वीरगञ्जको घण्टाघर नजिक बेवारिसे अवस्थामा जेठ २८ गते एक युवकको शव फेला परेको थियो । शव पोष्टमार्टमका लागि सोही दिन नारायणी अस्पताल लगिएको र कोरोना परीक्षण गर्दा शुक्रबार उनमा कोरोना देखिएको हो ।

यसैगरी बाराका ५ वर्षीय बालक जसको उपचारका क्रममा शुक्रबार मृत्यु भएको थियो, उनमा पनि कोरोना पुष्टि भएको हो । उच्च ज्वरो र श्वासप्रश्वासमामा समस्या भएपछि वीरगञ्जको हेल्थ केयर अस्पतालमा उपचारका लागि ल्याइए पनि उनको शुक्रबार नै मृत्यु भएको हो । यसअघि नै आरडीटी विधिमार्फत कोरोना परीक्षण गर्दा उनमा पोजेटिभ पाइएको थियो । उनको मृत्युपछि नारायणी अस्पतालमा गरिएको पीसीआर परीक्षणमा आज कोरोना पुष्टि भएको छ ।

योसँगै नेपालमा कोरोना संक्रमणबाट मृत्यु हुनेको संख्या १८ पुगेको छ ।