हेल्थ टिभी अनलाइन \डडेल्धुरा : डडेल्धुराका कोरोना संक्रमित युवक कोरोना पुष्टि हुनुअघि उपचार गराउन डडेल्धुरा अस्पताल आएको पाइएपछि अस्पतालका चार चिकित्सकसहित ७ जनालाई क्वारेन्टाइनमा राखिएको छ।

स्वास्थ्य मन्त्रालयले शुक्रबार उनमा कोरोना संक्रमण भएको पुष्टि गरेको थियो। डडेल्धुराको परशुराम नगरपालिका–१० का २८ वर्षीय ती युवक जेठ ६ गते अस्पताल आएका थिए । अस्पतालले उनलाई स्क्रब टाइफस भएको बताएको थियो।

उक्त युवकलाई ज्वरो पनि आएकाले स्वाब सकंलन गरी परीक्षण गरिएको थियो । अहिले उनको स्वाब संकलनमा खटिएका चिकित्सक र अन्य स्टाफहरूलाई क्वारेन्टाइनमा राखिएको अस्पतालका निमित्त मेडिकल सुपरिटेन्डेन्ट डा जगदीशचन्द्र विष्टले जानकारी दिए। डा विष्टका अनुसार जेठ ६ गते स्वाब सकंलन पश्चात युवकलाई घरमै आराम गर्न सुझाव दिएर घर पठाइएको थियो।

क्वारेन्टाइनमा रहेका चार चिकित्सक र अन्य तीनजना स्टाफको आजै कोरोना परीक्षणका लागि थ्रोट स्वाब संकलन गरिने डडेल्धुरा अस्पतालका सुचना अधिकारी टंकप्रसाद पन्तले जानकारी दिए।

कोरोना संक्रमित युवक  हाल डडेल्धुरा अस्पतालको आइसोलेसनमा रहेका छन्।